我哋今次再詳細啲去講租屋當中嘅流程。
搵盤
首先，普遍都會上去rightmove 或 zoopla 搵盤，agents 係會有啲未放上市場嘅盤告知我哋，但資料就未必完全齊備，例如未有內部相片、未有確實起租日期、甚至未有確實定價等，所以，主力都係靠以上兩個渠道係最多最齊最集中。
當見到啱心水嘅盤，主要都係用電話聯絡地產經紀（agent)，有時打電話打咗好多次都冇人聽，就先爭取時間上網填咗啲基本資料俾agent 先，希望喺你未打到電話之前佢會主動搵你（當然呢個機會好微，但都有幸試過agent自動打返電話嚟嘅）。打得通呢個電話搵啱人你就成功咗第一步，agent或會直接安排睇樓時間，但如果間屋仍然有租客住緊，agent就要稍後和租客夾好時間才覆你。留意番，如果agent好耐都冇搵返你嘅話，你需要再打電話去跟進，因為有時佢哋係會唔記得咗，又或者曾經嘗試搵過你一次你冇聽電話佢哋就唔會再搵你，直接放棄你。
另外，有時見到啲盤經OpenRent出租，即係由業主自己放盤，不經地產經紀，約睇這類型嘅盤最直接就係上OpenRent嘅平台搵返個盤出嚟，然後send message俾個業主，講自己background，希望業主選中你，安排你去約睇。
睇屋&出Offer
睇屋當日，agent 會大概講一次間屋各樣嘢俾你知，有任何疑問請當刻問清楚，同agent傾過嘅重要事項請你出Offer嘅時候清楚寫明，免得之後口同鼻拗，例如你見到隻窗爛咗而agent話業主會整返，你就喺出Offer時寫明 “assumed the broken window in kitchen will be repaired before tenancy starts”。出offer主要係填offer form 或者出個offer email, 之後再補電話確認agent收到你嘅offer。出offer時，要列明租金、租期、起租日期、會否俾upfront, 會俾幾多個月等。跟住就係講出你對間屋嘅要求，例如要做專業清潔，要油油，要處理牆身發霉，同埋先前提及嘅一啲特別事項等。
而每個agent收到offer後做法都可能不同，有啲一收到有人出offer，就會交俾業主睇吓接唔接受。有啲就等吓先，收齊晒先一次過交俾業主決定揀邊一個。所以，如果有心租嘅話，唔好拖得太耐，盡快決定然後通知agent，成功機會就會大啲。
當業主選中你，你需要先交一個星期按金（holding deposit)，他們收到你嘅按金之後就會停止安排其他人再睇盤，佢哋亦都不會再接受新offer，代表你已經成功hold咗間屋。
Reference check
交完按金之後就要做reference check，呢個係由第三方（獨立公司）去審核你嘅資料。好多朋友都覺得呢個步驟好煩，既然已經預咗要交12個月租金預繳，點解仲要提供咁多資料，覺得佢哋處理欠缺彈性等等… 冇錯，你要有心理準備，係好煩，但這個步驟仍然係絕大部份agent正在採用的，只有極少極少數嘅agent冇經reference check。
過完reference check之後，agent就會草擬一份租約交給你過目。曾經有朋友問過會唔會過唔到reference check，租唔到樓。Referencing company 當中細節點樣處理冇考究，但經驗話俾我哋聽，只要交齊所有資料，又有租金預繳嘅話，香港過嚟嘅朋友係冇試過唔批嘅。Agent 隨即亦會列明餘下嘅租樓款項：包括租金預繳，五個星期嘅按金（呢畢錢係會喺完約之後退返俾你，如果你冇被對方因為間屋嘅各種問題而扣錢嘅話），扣減返之前已付那一個星期之按金（holding deposit)，留意租約應該要例明所有租客名稱，請檢查清楚對方有冇打錯字，因為我哋大部份人嘅英文名都係拼音而來，佢哋有時會串錯字的）。假如業主或租客對呢份租約沒有任何問題，agent 就會出一份正式租約，由雙方簽署，之後你就可以喺起租期前交埋尾數。
起租
起租當日，agent就會安排交鎖匙給你。跟住7至10日後就會收到inventory report （有少部份公司可能起租當日就已經有inventory report)， 請睇清楚間屋有冇啲咩問題，如果同report有出入，咁就要盡快提出，通常有七日時間俾你提出任何修改。
水電煤
水電煤方面，有啲朋友問是否需要未入住之前申請，怕會被cut水電媒，其實即是你未申請未登記，你入住嘅時候都會有水電煤供應的（除非你往後一路都唔申請唔登記就另計）。你可以喺起租當日先記錄返水電煤錶嘅讀數（inventory report 亦都會有電煤讀數之記錄，但好多時水就未必有，因為未必搵到個水錶），然後先慢慢上網登記返水（你嘅地區只有一間水供應商，所以冇得揀）公司嘅戶口。而電煤公司有得揀，你可以上網格吓價 （google search 吓 compare energy / compare gas and electricity) 已經有好多網站會提供報價，有好多仲可以透過Top cashback 取回贈呢。只要你輸入間屋嘅地址(postcode)便會有唔同公司嘅價錢參考，格完價揀定咗公司之後再上公司網站登記，入返之前你已經mark低咗嘅讀數同你入住日期（入住日期係你份合約上之起租日期，唔係你搬入間屋住嘅日期），咁電煤公司就會知道由幾多度開始charge 你，至於揀邊間電煤公司好，你可以喺網上睇reviews，越多人評價，越多星，就應該越可靠。
Council tax 方面，你則可以有租約後（即使未入住前）就去申請。每個Council唔同，但基本上都係上返所屬council 嘅website 就會搵到相關資料，教你點樣去交Council Tax。
最後，當然唔好忘記申請寬頻同埋TV license 啦。祝大家一切順利！
溫馨提示，以上是我們經驗之談，唔代表所有租務嘅流程都一定一模一樣。
我們現時所提供之服務範圍為Reading, Wokingham, Bracknell, Maidenhead 和距離Reading 一小時車程內之地區。
英國嘅 Overcrowded Rule
Comments
Post a Comment